काठमाडौं । काठमाडौं विश्वविद्यालय, स्कूल अफ ल का डीन डा. विपिन अधिकारीले आउँदो चैत ३० गतेबाट लागु हुने गरी बुधबार पदबाट राजीनामा दिएका छन् ।
डा. विपिन अधिकारी स्कूल अफ ल का संस्थापक डीन हुन् । उनले काठमाडांै विश्वविद्यालय अन्तर्गत व्यवस्थापन तथा अर्थशास्त्रलाई एकीकृत गरी कानुनको पाँच वर्षे स्नातक अध्ययन कार्यक्रम तथा अनुसन्धानमा आधारित उर्जा तथा पूर्वाधार विकास कानुन सम्बन्धी स्नातकोत्तर कार्यक्रमहरु सञ्चालनमा ल्याएका थिए ।
नेपालको आर्थिक विकास, राष्ट्रिय तथा अन्तर्राष्ट्रिय लगानी, व्यापार व्यवसाय तथा सांगठनिक क्षेत्र (कर्पोरेट सेक्टर) सँग सम्बन्धित यी विषयहरुले मुलुकको विकास तथा निर्माणको वर्तमान आवश्यकता पूरा गर्ने कानुनी जनशक्ति निर्माण गर्ने उद्देश्य राखेको छ । यी सबै कार्यक्रमहरु सफल मानिन्छन् ।
अधिकारी डीनको रुपमा छैठौं वर्षमा कार्यरत थिए तथा नयाँ नेतृत्व चयनका लागि उनले सहजीकरण गर्न चाहेको बताइन्छ । डीन डा. अधिकारीसँग कुराकानी गर्न खोज्दा उनीसँग फोनमा सम्पर्क हुन सकेन ।